УИХ-ын гишүүн Т.Доржхандын хүү БЗС-аас зээл авсан тухай мэдээлэл олон нийтэд ил болоод байгаа юм. Үүнийг дагаад улс төрд нөлөө бүхий эрх мэдлээ ашиглаж, хүүдээ Засгийн газрын тусгай сангаас зээл авч өгсөн үү, зээлээ төлсөн үү гэдэг асуулт үүссэн.

Тэрээр дараах тайлбарыг өгсөн юм. 

"Манай хүү намайг УИХ-ын гишүүн болохоос өмнө БЗС-аас зээл авсан. Суралцаж дуусаагүй байхад нь би УИХ-ын гишүүн болсон. Тэр үед өөрөө "Та гишүүн болчихсон юм чинь би зээл авахаа больчих уу" гэж асуусан. Би өөрөө мэд л гэсэн. Зээлээ тэгээд зогсоосон юм билээ. Суралцаж дуусаад таван жилийн дотор зээлээ эргэн төлөх гэрээ хийсэн юм байна. Гэхдээ асуудал нэгэнт ийм болоод байгаа учраас өөрөө ойрын хугацаанд төлөөд дуусгая гэж ярьсан. Хүмүүс намайг төлчхөөч гээд байгаа. УИХ-ын гишүүн гэхээр л баян гэж боддог. Бас ядуу гэж би яримааргүй л байна. Гэхдээ одоо 24, 25 нас хүрсэн том залуу авсан зээлээ өөрөө л төлөх ёстой. 100 орчим сая төгрөгийн асуудал яригдаж байгаа. Намар гэхэд төлчих боломжтой, одоо 60-70 хувийг нь бүрдүүлчихсэн гэсэн" гэлээ.

Гэтэл тэрээр УИХ-ын гишүүн болохоос өмнө Сангийн яамны Санхүүгийн бодлого, өрийн удирдлагын газрын дарга, Зээл тусламжийн бодлогын газрын орлогч дарга, гэх мэт төрийн өндөр албан тушаал хашиж байсан намтартай. Төрийн мэдээлэлд ойр байгаа улс төрч мэдээллийн давуу байдлаа ашиглан Ардын хүүхдийн сурах боломжоос хумсалсан байж болзошгүй. Түүний хөрөнгө орлогын мэдүүлгийг харвал тэрээр "Монре даатгал" ХХК-ийн 90 хувийг эзэмшдэг. Жилийн орлого нь 100 сая хол давсан, 1.09 тэрбум төгрөгийн үл хөдлөх хөрөнгөтэй. Төрсөн хүүхдэдээ хотойхгүйгээр хувийн зардлаар гадны улсад сургачих боломжтой чинээлэг нэгэн юм. Гэтэл ийнхүү БЗС-ийн зээлээр хүүхдээ сургасан асуудалд иргэд олон нийт жигшиж байна.