Төсвийн тухай хуулийн 8.3.3 дахь заалт, Монгол Улсын нэгдсэн төсвийн 2026 оны төсвийн хүрээний мэдэгдэл, 2027-2028 оны төсвийн төсөөллийн тухай хуулийг тус тус үндэслэн Монгол Улсын Засгийн газраас төсвийн ерөнхийлөн захирагч нарын 2026 оны төсвийн орлогын доод хязгаар, төсвийн зарлагын дээд хязгаарыг баталсан. Төсвийн ерөнхийлөн захирагч нар энэ тогтоолоор баталсан төсвийн хязгаарт нийцүүлэн 2026 оны төсвийн төслөө боловсруулах учиртай.

Төсвийн төслийг боловсруулахдаа олон нийтээс авсан саналыг тусган, төсвийн төслийг Сангийн яам наймдугаар сарын 15-нд өргөн барьж, Засгийн газрын хуралдаанд танилцуулна. Улмаар ирэх есдүгээр сарын 01-нд УИХ-д өргөн барих ёстой юм. Өөрөөр хэлбэл, 2026 оны төсөв батлагдаагүй хэлэлцүүлэх шатандаа явж байгаа бөгөөд олон нийтийн саналыг наймдугаар сарын 14-нийг дуустал хүлээн авна.

Тухайлбал Эрчим хүчний сайд Б.Чойжилсүрэнгийн 2026 оны төсвийн хязгаарын урсгал зардлыг 85.3 тэрбум төгрөг, хөрөнгө оруулалтыг 374.8 тэрбум төгрөг нийт 460.1 тэрбум төгрөгөөр баталсан байна.

Эрчим хүчний сайдын багцын урсгал зардлын:

• 50 хувийг эрчим хүчний үйлдвэр компаниудад алдагдлын татааст,
• 44 хувийг гэр хорооллын айл өрхийн цахилгааны хөнгөлөлтөд,
• 3 хувийг эрчим хүчний яамны албан хаагчдын цалин, үйл ажиллагааны зардалд,
• 3 хувийг Эрдэнэбүрэн болон Эгийн голын УЦС барих төслийн бэлтгэл ажлыг хангах зардлуудад тус тус төлөвлөөд байна.

Компаниудын санхүүгийн алдагдлыг улсаас татаас олгохгүй байдлаар шийдвэрлэвэл, хэрэглэгчдэд борлуулах цахилгаан, дулааны эрчим хүчний одоогийн тарифыг 80-100 орчим хувиар нэмэгдүүлэх шаардлагатай бөгөөд энэ нь хэрэглэгчдэд төлбөрийн томоохон дарамт үүсгэх тул 2026 онд татаас олгохоор тооцоолжээ.

Харин 2025 онд нийт 407 тэрбумаар батлагдсан АҮЭБЯ-ны төсөв одоогоор 59,8 хувийн гүйцэтгэлтэй байгаа бөгөөд 2025 онд хүлээгдэж байгаа гүйцэтгэл 303 тэрбум орчим. 2026 оны төсвийн хязгаар 288 тэрбум төгрөгөөр батлагджээ.