Монгол Улс хүнсний ногооныхоо 40 хувийг импортоор авдаг бөгөөд татварт мэдээлсэн дүнгээр жилдээ 25 сая ам.долларын нарийн ногоо гаднаас оруулж ирдэг гэх тоо бий. Харин нарийн ногооныхоо 80 хувийг импортоос бүрдүүлж, үлдсэн 20 хүрэхгүй хувийг дотоодын аж ахуйн нэгжүүд хангадаг байна. Тиймээс нийслэлээс энэ асуудалд анхаарч, нийслэлд Агро сити буюу дөрвөн улирлын цэцэрлэгт хүрээлэн барихаас төлөвлөж байна.

Энэ талаар нийслэлийн Засаг даргын орлогч Т.Даваадалайгаас тодруулахад “Төр, хувийн . түншлэлээр дөрвөн улирлын хүлэмж болон дэд станцыг өргөтгөх ажилд энэ жил 7.5 тэрбум төгрөг  төсөвлөсөн. Нийслэл гэлтгүй Монгол Улс хүнсний нарийн ногооныхоо гурав хүрэхгүй хувийг дотоодоосоо хангадаг. Тийм учраас хүнсний аюулгүй байдал, хүн амын эрүүл мэндэд зориулж нарийн ногоо, жимс жимсгэнийг дотооддоо тарьж, ургуулах шаардлагатай. Энэ ажил Улаанбаатар хотын 2040 ерөнхий төлөвлөгөөнд тусгагдсан бөгөөд Агро сити буюу эдийн засгийн тусгай бүсийг Налайх, Сонгинохайрхан дүүрэгт хөрсний шинж чанарыг тодорхойлж, төлөвлөсөн” гэдэг мэдээллийг өгсөн юм.

Судалгаагаар Улаанбаатарын хотын хэмжээнд 50 га өвлийн хүлэмж шаардлагатай бөгөөд үүнийг барьчихвал дотоодын хэрэгцээгээ хангана гэдэг тооцооллыг өмнө нь хийж байжээ. Гол нь нэг га өвлийн хүлэмж 1.5-2 сая ам.долларын өртгөөр босдогоос гадна зургаа дахь жилээсээ эхлэн ашгаа өгдөг аж.