Иргэний нисэхийн үндэсний төвийн даргаар Б.Отгонсүхийг томилсон байна.

Хэдийгээр ИНЕГ, ИНҮТ-ийг нэгтгэн цэгцлэх асуудал өрнөж байсан ч ийнхүү шинэ даргатай болгочихлоо. Мөртлөө ИНЕГ-ыг хоёр жил гаруйн хугацаанд түр статустай удирдаж буй Р.Мөнхтуяагийн асуудлыг эрх баригчид дахиад л орхиж байна.

Б.Отгонсүхийн хувьд санхүүгийн аль ашигтай албан тушаалд томилогдож ирсэн намтартай нэгэн. Өнөөгийн Шадар сайд С.Амарсайханыг Нийслэлийн Засаг дарга байх үед орлогчоор нь ажиллаж байв. Өвөрхангайн фракцын дэмжлэгтэй, С.Амарсайханы хүн гэгддэг Б.Отгонсүх ингэж дараагийн албан тушаалдаа ирлээ.

ИНҮТ-ийн хувьд 2019 онд байгуулагдсан, ИНЕГ-ын чиг үүргийг хуваадаг, төдийлөн шаардлагагүй байгууллага гэж харагддаг. Том төсөвтэй, үргэлгэн зарцуулалт их, зөрчил олонтой нь аудитын тайлангаар удаа бүр нотлогддог юм.

Өдгөө ИНЕГ, ИНҮТ-ийг хэнд, хэний хүнд хариуцуулах нь хөшигний ард тохиролцоонд хүрч чадахгүй, хөндөж сөхөхгүй байгаа сэдэв юм. Тэгвэл ийнхүү стратегийн хувьд чухал ч ажил нь олон нийтийн нүднээс далд, ихээхэн мөнгө эргэлддэг байгууллага бүрд томилогдон ажилладаг Б.Отгонсүх ИНҮТ дээр ирлээ.

Б.Отгонсүх Замын-Үүд дэх гаалийн газрын дарга байсан. Дараа нь "Монголын төмөр зам" ТӨХК-ийн даргаар ч очсон. Нэг албан тушаалд ихдээ хоёр жил гаруй ажиллаад л "сэлгэдэг" дүр зурагтай байна.

Зүй нь, чиг үүрэг давхардаж, төсвийн мөнгө үрэхээс гавьдаггүй ИНҮТ гэж байгууллагыг ИНЕГ-тай нэгтгэж, хариуцлагатай томилгоо хийх ёстой байв. Б.Отгонсүх ирж байгаагаас харахад түүгээр дамжуулан эрх баригчид ИНҮТ дээр тодорхой шинэчлэлүүд хийнэ. Бодлогын өөрчлөлтүүд гарах магадлалтай.

Гэхдээ Б.Отгонсүх бол даргын хувьд даалгавар биелүүлэгч л юм. Өөрийн амбицтай удирдлага биш. Тийм ч учраас ИНЕГ, ИНҮТ-өөс эрх баригчдын эрх ашиг сална, цэгцэрнэ гэдэг хүлээлт хольцгүй биелтлээ удахаар л байна.

Г.САНСАРМАА<