“Ардчилсан нам Засгийн газарт орохдоо гуйж ороогүй, гуядаж орсон шүү” гэх сануулгыг УИХ-ын гишүүн Б.Жаргалан УИХ-ын чуулганы өнөөдрийн /2024.10.04/ нэгдсэн хуралдааны үеэр өглөө.
Тэрбээр “Олонхийн бүлгийн гишүүд өчигдрөөс Ардчилсан намаас томилогдоод ажиллаж байгаа сайд нар луу дайрсан, өөрсдийнхөө өнгөрсөн найман жилд хийсэн алдаа дутагдлыг томилогдоод хоёр сар болж байгаа сайд нараас нэхсэн попорсон уур амьсгалтай хурал болгож байна.
Юу гэж хэлэх гээд байна вэ гэхээр МАН-ын дарга Ардчилсан намд урилга өгсний дагуу бид хамтарсан Засгийн газарт орсон. Бид хамтрах эсэх дээр дотроо нухацтай ярьж байгаад, дахиад дөрвөн жил алдмааргүй байна. Улсын эдийн засгийг өөд нь татах хэрэгтэй байна, иргэдийн амьдралыг сайжруулах шаардлага байна, томоохон төслүүдийг явуулах хэрэгтэй байна, эдийн засгаа тэлэх хэрэгтэй байна гэсэн дүгнэлтэд хүрсний үндсэн дээр хамтарсан Засгийн газарт ороод ажиллаж байгаа. Тийм ч учраас эдийн засгийн хүрээний бүх ачаалал манай сайд нарт ирж байна. Шинэ парламент байгуулагдсанаас хойш эдийн засагтай холбоотой бүх асуудлууд дээр Эдийн засаг хөгжлийн сайд Л.Гантөмөр хамаг ачааллыг аваад эдийн засгаа тэлэхийн ач холбогдол, бүх зүйлийг тайлбарлаад яриад явж байгаа. Аж үйлдвэр эрдэс баялгийн сайд Ц.Туваан “Mining Week & MinePro-2024” чуулганд оролцоод гадаад дотоодын хөрөнгө оруулагчийг татах, хэдэн төслүүдээ босгож ирэх ажлыг хөөцөлдөөд явж байна. Байгаль орчин уур амьсгалын өөрчлөлтийн сайд С.Одонтуяа усны асуудлыг шийдэх, цөлжилттай тэмцэх зэрэг асуудалд анхаараад явж байна.
Улс орны эдийн засгийг өөд нь татах нь чухал гэж үзсэн учраас бид Засгийн газарт хамтраад явж байгаа шүү гэдгийг өчигдөр үг хэлээд байсан гишүүд ойлгоосой.
УИХ-ын ээлжит бус чуулган дээр ч гэсэн та нарын/олонхийн бүлэг/ хэлэлцэж чадаагүй байсан гүйцэтгэлийг хэлэлцэж байхад өмнө нь өөрөө сайд байсан нөхөр томилогдоод хэдхэн хонож байгаа манай сайдаас гүйцэтгэл нэхсэн шүү. Ийм байдлаар цаашдаа хамтраад явна гэдэг асуудалтай санагдаж байна.
Хамтарсан юм чинь Ардчилсан намын бүлэг хамаагүй гэдэг байдлаар хандмааргүй байна. Ардчилсан нам Засгийн газарт хамтарсан гээд гишүүд нь үг хэлээ үдүүлэхгүй шүү. Тэрийг ойлгоорой” гэж байр сууриа илэрхийлэв.
УИХ-ын 2024 оны сонгуулийн үр дүнд МАН 68, Ардчилсан нам 42, ХҮН нам найм, Үндэсний эвсэл дөрөв, Иргэний зориг ногоон нам мөн дөрвөн суудал авсан. Улмаар МАН-ын дарга Ерөнхий сайд Л.Оюун-Эрдэнэ улс төрийн намуудад урилга илгэхээд Засгийн газарт хамтрах саналыг Ардчилсан нам, ХҮН нам хүлээн авсан билээ. Гэвч хамтарсан Засгийн газрын бүрэлдэхүүнд багтаад удаагүй байгаа Ардчилсан намынхан үг хаяж эхэлсэн нь орон нутгийн сонгуулиас болж, улстөржилтөө тэргүүнд тавив уу, аль эсвэл Ардын намынхан нь үнэхээр Ардчилсан намын сайд нарт ачаа үүрүүлчихээд өө хайцгаан улстөржин золигтож уурыг нь барж эхэлсэн үү гэдэг асуудал ч хөндөхөд хүргэж байна.
УИХ-ын гишүүн Б.Жаргалан нь Ардчилсан намын жагсаалтаар парламентад сонгогдсон бөгөөд Эдийн засаг хөгжлийн сайд асан Н.Батбаярын охин юм.
Г.ХОРОЛ
