Өөрийгөө бүхэл бүтэн вант улсын захирагч гэж эндүүрдэгхүн бол Говь-Алтай аймгийн Засаг дарга О.Амгаланбаатар. Түүний гаргасан хамгийн сүүлийн захирамж л гэхэд үүнийг илтгэв.

Тодруулбал, 2023 он дөрөвдүгээр сарын 12-ны өдөр түүний гаргасан А/198 дугаар захирамжид тавдугаар сарын 1-ний өдрөөс албан бичиг, захирамжлалын баримт бичгийг хос бичгээр үйлдэх"-ийг үүрэгджээ.

Засаг даргынхаа захирамжийн дагуу төрийн болон төрийн өмчит аж ахуйн нэгж байгууллагууд нь монгол бичиг болон крилл гэсэн хос бичгээр бичиж эхэлнэ гэсэн үг.

Гэвч төр засгийн шийдвэрээс урьтаж албан бичгийг хос бичгээр бичихийг нэг аймгийн Засаг дарга дангаараа шийдвэрлэчихдэг асуудал биш.

"Үндэсний бичгийн хөтөлбөрийг үе шаттай хэрэгжүүлж, зохих бэлтгэл хангасны үр дүнд төрийн болон орон нутгийн өөрөө удирдах байгууллага албан хэргээ 2025 оны нэгдүгээр сараас хос бичгээр хөтөлнө" гэдэг шийдвэр гарчихсан.

Тэгэхээр О.Амгаланбаатар төр засгийн шийдвэрлэсэн энэхүү хугацаанаас урьтаад дур мэдэж байгаа нь нэг ёсондоо хууль зөрчиж байгаа хэрэг гэхэд ч буруудахгүй. Түүний ийн вант улсын захирагч шиг дураар дургиж байгаа анхны тохиолдол биш.

Өмнө нь, ОХУ-ын Ерөнхийлөгч В.Путин дайчилгааны тогтоолд гарын үсэг зурсны дараа хойд хөршийн залуус манай улсад олноор орж ирсэн билээ. Тухайн үед Ерөнхийлөгч У.Хүрэлсүх, Гадаад харилцааны сайд Б.Батцэцэг нар тодорхой байр суурь илэрхийлээгүй байхад О.Амгаланбаатар ОХУ-аас ирсэн иргэдийг аймагтаа урьж байв.

О.Амгаланбаатар хэдий болтол Говь-Алтайг тусгаар улс шиг санаж, түрүүлж хөдөлж, шийдвэр гаргасаар суух вэ.

У.УЯН