ОХУ-ын Ерөнхийлөгч В.Путин дайчилгааны тогтоолд гарын үсэг зурсны дараа иргэд нь бусад улс руу дүрвэх болсон. Монголд ч өдөрт дунджаар 900 орчим ОХУ-ын иргэд ирж байна. Тэдний дунд монгол цуст буриад, халимаг, тува зэрэг үндэстнүүд ч багтана. Энэ үүднээс 30 хоногийн виз нь дууссаны дараа хэрхэх вэ, тэдэнд арай өөр боломж олгох уу зэрэг асуудал анхаарал татсаар байгаа.

Гэвч энэ асуудалд өдгөө Ерөнхийлөгч У.Хүрэлсүх, Гадаад харилцааны сайд Б.Батцэцэг нар тодорхой байр суурь илэрхийлээгүй явна. Ерөнхийдөө ямар бодлого баримтлах нь төдийлөн тодорхой биш, нөхцөл байдлыг харзнасан шинжтэй байгаа.

Тэгвэл Говь-Алтай аймгийн Засаг дарга О.Амгаланбаатар ОХУ-аас ирсэн иргэдийг аймагтаа урьжээ. "Энд амьдрал, ажлын байр байна, бид хүлээж авна" гэсэн утгатай энэ мэдэгдэлдээ орос хадмал орчуулга ч тавьсан байх юм. Улс нь байр сууриа илэрхийлээгүй байхад О.Амгаланбаатар Говь-Алтайг тусгаар улс гэж санасан янзтай үйлдэл гаргав.

Монгол Улсын нутаг дэвсгэрт хамаарч буй л бол Говь-Алтай аймагт визний хугацаа дууссан ОХУ-ын иргэд амьдарч болохгүй. Улаанбаатарт ч, Говь-Алтайд ч нөхцөл байдал ижил гэсэн үг. Мөн улсын гадаад бодлого нэгдмэл байх ёстой, үүнийг төрийн эрх бүхий субъектүүд нь л төлөөлөн илэрхийлдгийг санасангүй бололтой.

Г.САНСАРМАА