Цахилгааны үнэ нэмж, нэмэлтээр 200 мвт-ыг төвийн нэгдсэн системд холбосон ч нийслэлд цахилгааны хязгаарлалт хэвээр үргэлжилж байна. Мөн хувийн хэвшлийн цахилгаан станц болох Бөөрөлжүүтээр хамаг л хотын томчууд, эрчим хүчнийхэн очиж сурталчилгаа хийсэн ч тэр нь эрчим хүчинд төдийлөн нэмэр болсонгүй.
Тухайлбал, Өнгөрсөн сард Хотын дарга Х.Нямбаатар сэтгүүлчдэд мэдээлэл өгөх үеэрээ “Миний бие Нийслэлийн Засаг даргаар томилогдоод жил гаруй болж байна. Би ажлаа авсныхаа дараа эрчим хүчний эх үүсвэрийг 200 мвт-аар нэмэгдүүлнэ гэсэн төсөл танилцуулсан. Энэ онд хэлсэн үгэндээ хүрлээ. Багануурын 50 мгв-ын станц ашиглалтад ороод хэвийн горимоор ажиллаж байгаа. Үүн дээр Бөөрөлжүүтийн 150 мвт-ын цахилгаан станцыг нэмээд ашиглалтад оруулчихвал нийт 200 мвт-ын эрчим хүчийг нэгдсэн системд холбож шинэ оноор тог таслахгүй болно” гэж попорч байсан ч хэлсэндээ хүрсэнгүй.
Учир нь энэ сарын 2-ны өдөр /2025.12.02/ хоёр дүүргийн есөн хороонд 16:30 цаг хүртэл цахилгааны хязгаарлалт хийжээ.
Тодруулбал, Нийслэлийн Баянгол дүүргийн 20-р хороо, Сонгинохайрхан дүүргийн 17, 18, 19, 20, 24, 32, 5, 6 -р хороонд өчигдөр /2025.01.02/ 14:30 цагийн орчимд тог тасалжээ. УБЦТС ТӨХК-аас мэдэгдсэнээр цахилгааны хязгаарлалт 16:30 цаг хүртэл үргэлжлэх төлөвтэй байсан. Үүнтэй зэрэгцэн Эрчим хүчний системийн 2025 оны нэгдүгээр сарын 1-ний өдрийн оргил ачаалал 19.00 цагт 1432 МВт хүрч өнгөрсөн оны мөн үеэс 160 МВт-аар, импорт 41 МВт-аар тус тус өссөн үзүүлэлттэй байгааг Эрчим хүчний зохицуулах хорооноос мэдээлсэн. Иймд хэрэглэгчид та бүхэн энэ цагуудад ашиглах шаардлагагүй цахилгаан хэрэгслүүдээ унтрааж, хэрэглээгээ зохицуулахыг УБЦТС ТӨХК-аас анхааруулав.
Ингэхдээ мөн цаашид Улаанбаатар хотын эрчим хүчний системд хязгаарлалт хийгдэхгүй байх боломж бүрдлээ гэж мэдээлж байсан юм. Гэвч албаныхан болон хувийн цахилгаан станцаар попрогчдын үг худлаа болж шинэ он гараад л дахин цахилгаан хязгаарлалт хийжээ.
Д.ЖАРГАЛМАА
